RWĨMBO RWA MAHANDA

Rwĩmbo rũrũ nĩ rwega ma
Nĩ rwĩmbo rwa mahanda
Harĩa rũinagĩrwo nĩ hega ma
Na hetagwo nyinia ngũinie
Rũinagwo na mahanda
Ma mbegũ cia magetha ma rũciũ
Iria ihandagwo na rũciciũ
Rwĩmbo rũrũ nĩ rwega ma

Rĩrĩa mbũra yatutungĩria
Na mĩtĩ yainamũrwo nĩ huho
Cia mbura ĩno ĩrĩ njĩra
Makubu marũngiĩ ta hĩa
Na matu ma mbura makĩnyitana
Nĩ guo mĩgũnda mĩnoru ĩrĩmagwo
Mbegũ ihandwo na rũciciũ
Rwĩmbo rũrũ nĩ rwega ma

Kwambagĩrĩrwo matũgũta
Gũgĩgakinya mahanda
Amwe magakungĩra njũgũinĩ
Angĩ magakunga na ngiri
O mũndũ na mũro wake
Makainĩre nyinia ngũinie
Mbegũ ihandwo na rũciciũ
Rwĩmbo rũrũ nĩ rwega ma

Ciamera nĩ irĩmagĩrwo
Na igathikĩrĩrwo ciĩtire
Igekĩrwo mborera ikũre wega
Nĩ mũhandi na mũhandĩrwo
No rĩrĩa gũtarĩ mahanda
Rwĩmbo rwa matũgũta na moiruga
Nĩ cio itũũragia nyinia ngũinie
Rwĩmbo rũrũ nĩ rwega ma

Rwĩmbo rũrũ rũngĩmatamata
Na rũtigatuĩke rwa mwĩyenderi
Rũinagwo nĩ erĩ kwa erĩ
Rwegagia warĩ mũru
Rũkahoria warĩ mũhiũ
Rũgacangirũkia warĩ mũcangiru
Na rũgatheria warĩ gĩtharia
Rwĩmbo rũrũ nĩ rwega ma

No rwĩmbo rũngĩmatũka
Rũhunjage matũũra mothe
Rũgĩkũywo nĩ mwĩyenderi
Coro wa kũnenganĩrĩrio
Rũgathũranagia warĩ mũgathĩke
Rũkegũkia warĩ mwega
Na rũgathingũra warĩ mũthingu
Rwĩmbo rũrũ nĩ rwega ma

Mũkũi wa rwĩmbo rũrũ
Anagĩrĩra na mũgambo mũnene
Nĩ ngũthiĩ ndithiĩte
Ndathiĩte huria njũgũma
Marimainĩ ma nyinia ngũinie
Mbura ĩkiura ya marurumĩ
Karũciciũ na kangĩ
Rwĩmbo rũrũ nĩ rwega ma

Mũinĩrwo naake akoerera
Ngundia ikai ndĩigĩre
Wĩigĩire ndahũtaga
Rĩa kũmeria ti rĩa gũtua thĩ
Kũmeria nĩ kũmerithia
Mbegũ hande na rũciciũ
Cia riũwa itimenyagĩrwo
Rwĩmbo rũrũ nĩ rwega ma

No nĩ kũrĩ mwega wegũragwo
Mũtheki agathekũrwo
Cama ũgacamithũrwo
Wakana mũno wĩtunyaga nyama
Nyinia ngũinie ĩgatuĩka icua
Mĩoyo igaitwo thĩ
Rwĩmbo rũgatuĩka rwa mbu
Kwa rwendo gũgacoka rũmena

Rwĩmbo rũrũ nĩ rwega ma
No rũkinyagwo mũracaraco
Rũtikwenda kabacia
Kana mũini wa rũrĩa rũkũye
Mũrio nĩ wĩrĩyagĩra
Mũtũkanio ũkarehe mũthebeyo
Mũhandi akahandũrwo
Nyinia ngũinie ĩkamũita thĩ tũhũ

© Mũthaatũ 2000 Gatua wa Mbũgwa