Marebeta ma Gatua wa Mbũgwa 2
  Click here for ENGLISH VERSION      Hihinya haha NDŨNYŨ ũgure TN


Mũtaratara
Mũciĩ
Ndũnyũ ya TN
Ũhoro wa Mũrebeti
Marebeta
Njaranda
Ndaũri
Ũrĩa maroiga
Rũga
Twandĩkĩre


GAKURUGUTIA

Gakurugutia wanyumire na kũ
Tondũ wang’athia ta ndemwa kana gathukĩ
Ndĩrakwenyenyia ũkaregera o igũrũ
Na ndũrĩ nyama ingĩiyũra mũkuha
Gakurugutia wĩ wa mũtheemba ũ
Ngũkũũre ta igego rĩbuthĩire kanua
Nĩ ũrĩa ũnungĩtie gĩikaro gĩkĩ gĩakwa

Nĩ huho kana nĩ mbura ngweteta
Kana nĩ riũa rĩa mũgaa kana nĩ icua
Kana nĩ marurumĩ na ngwa
Gakurugutia mũndũ ũtarĩ nyitĩro
Ngũgũkũũrũkia gĩkĩ gĩikaro
Ngũgaragarie kĩanda gĩkĩ ũkuona
Nĩ ũrĩa ũnungĩtie gĩikaro gĩkĩ gĩakwa

Na ngĩkũhe ũikaro ndwarĩ kĩũga
Wainainaga ta thaara nĩ guoya
Kana ta woirĩirwo nĩ mbura njĩrainĩ
Ngĩgwakĩria mwaki gakurugutia ndũgakue
Wagwata rũgarĩ ũkĩĩngarũrũka
Ndĩrĩkuonia nganga mbute we
Nĩ ũrĩa ũnungĩtie gĩikaro gĩkĩ gĩakwa

Nda ĩno yaku kaĩ ĩigana ya ndamathia
Watinda ũkĩrĩa na ndũrĩhũna
Maĩ ũnyũĩte mũtũngi na ũngĩ
Nyũngũ cia irio nĩ ta mwere
Ũcũrũ ndigithũ ng’ima na ndũhũne
Ngũkuoya ngũikie ndigithũ we
Nĩ ũrĩa ũnungĩtie gĩikaro gĩkĩ gĩakwa

Tarora ngima yaku nĩ ta kĩrĩma
Ũramĩrĩa na moko meerĩ
Kũmwe gwĩ kanua kũngĩ kwĩ njĩra
Ya kanua gaka gaku ũtatumia
Na mwana ndũmenyaga kĩrĩa arĩire
Ngũgũikĩria hũngũ na nderi we
Nĩ ũrĩa ũnungĩtie gĩikaro gĩkĩ gĩakwa

Gakurugutia weenjera ta kĩgera
Na ũĩ wega marĩ ũtũri marĩ njĩra
Kana hihi nĩ wariganĩirwo
Atĩ gĩturwa ti gĩaku ndukũ nĩ ndare
Na kamweke gaku waitĩrĩra thĩ tũhũ
Ngũgũkonya ta ria na ngũribaribe we
Nĩ ũrĩa ũnungĩtie gĩikaro gĩkĩ gĩakwa

© Kamũgaa 1999 Gatua wa Mbũgwa

Google



Gwakwo: Mũgaa 21, 2001;     Kwerũhio: Muoria Nyoni 20, 2006;     © 2001-2007 Gatua wa Mbũgwa