Marebeta ma Gatua wa Mbũgwa 3
  Click here for ENGLISH VERSION      Hihinya haha NDŨNYŨ ũgure TN


Mũtaratara
Mũciĩ
Ndũnyũ ya TN
Ũhoro wa Mũrebeti
Marebeta
Njaranda
Ndaũri
Ũrĩa maroiga
Rũga
Twandĩkĩre


ITUĨKA RĨA GŨTUĨKA

Ituĩka rĩa gũtuĩka
Rĩmenyekaga o gatene
Rĩĩrĩ ituĩka tũrĩĩte atĩa hihi
Nĩ ituĩka rĩa gũtuĩkaĩ
Kana nĩ ituĩka rĩa gũtuĩkĩra?
Kanya gatune nĩ mwamũkanĩro

Ituĩka ituĩkĩru
Rĩonanagia ituĩkĩro
Rĩtarĩ ituĩkanu biũ
Ituĩka ituĩkĩru ũguo
Nĩ ituanda cia mbarĩ ya iregi
Kanya gatune nĩ mwamũkanĩro

Ituĩka rĩ ituĩkĩru
Mĩgũnda ndĩrĩmĩkaga
Mĩciĩ ndĩakĩkaga
Tondũ ituĩka ta rĩu
Nĩ ituĩkania ngoro cia iregi
Kanya gatune nĩ mwamũkanĩro

Kaingĩ na kaingĩ
Kĩrĩa kĩgiragĩrĩria ituĩka gũtuĩka
Nĩ gũtiirĩrĩrwo na itũgĩ
Cia mbarĩ ya mũrĩa kwĩrĩ
Hiti cia mĩciingũ ĩĩrĩ
Kanya gatune nĩ mwamũkanĩro

Ituĩka rĩatuĩka
Mbarĩ ya mũrĩa kwĩrĩ yũranagia
Ngũthiĩ na ituĩkaĩ
Kana ngũtigwo na nemithia?
Mũrĩa kwĩrĩ nĩ hiti ya mĩcingũ ĩĩrĩ
Kanya gatune nĩ mwamũkanĩro

Rĩtuithanagia cira
Wa gũcenjia agacenjia
Wa gũikara agaikara ũguo
Rĩatuĩka rĩtuithanagia cira
Kanya gatune nĩ mwamũkanĩro

Arĩa magirĩrĩirie ituĩka
Rĩĩrĩ rĩtuĩkane biũ
Nĩ mbarĩ ya mũrĩa kwĩrĩ
Na kunda ngũtũme
Magui ma ngombaru gũkoroka
Kanya gatune nĩ mwamũkanĩro

Reke ngwĩre kiugo kĩmwe wĩ wa ndũgũ
Kĩoima kanua gĩtirĩ mũhĩti
Ituĩka rĩa Kĩrĩnyaga ngwĩre
Nĩ ituĩka rĩa gũtuĩka
Tara njara itanaganda
Kanya gatune nĩ mwamũkanĩro

Mũthenya ũrĩ maithoinĩ
Wa ituĩka rĩgĩtuĩka
Ituĩka rĩa iregi na itungati
Nĩ ma ituĩka rĩa Kĩrĩnyaga itũ
Nĩ ituĩka rĩa gũtuĩka
Kanya gatune nĩ mwamũkanĩro

We mbarĩ ya mũrĩa kwĩrĩ
Wĩcũũranie ngoro o gatene
Ũtanorĩra thĩ tũhũ
Ituĩka rĩa gutuĩka Kĩrĩnyaga itũ
Rĩatuĩka ituĩka ituĩku
Kanya gatune nĩ mwamũkanĩro

Kĩhu gĩa Kerĩ 1999 Gatua wa Mbũgwa

Google



Gwakwo: Mũgaa 21, 2001;     Kwerũhio: Muoria Nyoni 20, 2006;     © 2001-2007 Gatua wa Mbũgwa