Marebeta ma Gatua wa Mbũgwa 4
  Click here for ENGLISH VERSION      Hihinya haha NDŨNYŨ ũgure TN


Mũtaratara
Mũciĩ
Ndũnyũ ya TN
Ũhoro wa Mũrebeti
Marebeta
Njaranda
Ndaũri
Ũrĩa maroiga
Rũga
Twandĩkĩre


WENDO NDŨRĨ GUOYA

Kungĩra njũgũinĩ
wendo ndũrĩ guoya
Nguhĩrĩria ikuhĩ
Wendo ndũrĩ ngũha
Okooka na gũkũ ndĩ
Wendo ndũrĩ rwamba

Njogekerera rĩmwe
Nguogokerere rĩmwe
Wendo nĩ kwogekanĩrĩra
Ndeto ithiragĩra itherũinĩ
Gera gatagatĩ ka njĩra
Na ũũke ũgĩtaatagia wendo

Itaata rĩa wendo waku
Nĩ ta itaha rĩmwe rĩa njahĩ
Rĩhũũnagia kiumia kĩgima
Ngundia itaata rĩa wendo
Ngũkundie rĩmwe rĩa wendo
Wendo nĩ wa gũkundanio

Tũkĩina twĩ hamwe naawe
Nyĩmbo cia wendo witũ
Tũnyitanĩĩte njohero
Ona thitima irĩ ngwatie
Ũthiũ waku ũkengaga
Gũkĩra thitima irĩ ngwatie

Hingũra mũrango
Wendo ndũrĩ ũhinga
Hingũra icũhĩ
Cia icũrĩ irĩ mwĩrĩ
Ngundia ikai rĩa wendo
Ngũkundie rĩmwe rĩa wendo

Ngũigua mwaki kũgũrũ
Nĩ rwĩmbo rũrũ kũmata
Mwaki ũhoragio na mwaki
Ngurumoinĩ cia mĩaki
Nyonia mwaki kahoria
Kũgũrũ gũthirwo nĩ mwatio

Tiirũria rigĩ
Njũke na mũthĩgi
Naawe ũrehe mwatũro
Twakie mwaki nyũmba ĩno
Wendo wendaga ũngĩ
Waturanĩrwo ũgetwo wendani

Geragĩra thome
Mbũri igaathiĩ ikĩanagia
Igereire ya thome
Gĩtugĩ kĩa wendo ũyũ
Wa mũndũ na mũndũ
Magĩtuĩka mũndũ ũmwe

Kungĩra njũgũinĩ
Wendo ndũrĩ guoya
Ũkaga na mĩtheko
Na niĩ ngathekaga
Wendo nĩ ũthekagio
Irio cia ngoro nĩ mĩtheko

Hũthahũthĩria ngoro
Ngũhũthahũthĩrie yakwa
Wendo ũgũtũũra
Wendaga kũhũthahũthanĩrio ngoro
Ngundia ikai ngũkundie
Rĩa wendo wa gũtũũra

Njogekerera rĩmwe
Nguogokerere rĩmwe
Wendo nĩ kwogekanĩrĩra
Ndeto ithiragĩra itherũinĩ
Ũthiũ waku ũgũkenga
Mwaki ũrĩ ngoro ũgacarĩka rũrĩrĩmbĩ

Kĩhu gĩa Kerĩ 1999 Gatua wa Mbũgwa

Google



Gwakwo: Mũgaa 21, 2001;     Kwerũhio: Muoria Nyoni 20, 2006;     © 2001-2007 Gatua wa Mbũgwa